हङकङका चार किरातहरु बीच धनुवाण प्रतियोगिता हुंदै

७ नोभेम्बर, हङकङ– हङकङका चार किरातहरुः राई, लिम्बु, याक्खा र सुनुवार बीच किरातहरुको पौराणिक हतियार धनुवाण (आर्चरी) प्रतियोगिता हुने भएको छ ।
१७ नोभेम्बर २०१९ आइतबारका दिन लाइन रक आर्चरी क्लब हङकङमा हुन गइरहेको ‘प्रथम यलम्बर धनुवाण प्रतियोगिता २०१९’ मा दुई दर्जन बढि किराती पुरुष र महिला खेलाडीहरुले प्रतिस्पर्धा गर्ने धनुवाण प्रतियोगिताका सह–संयोजक अभिव याक्खाले बताए । 
समय संगै ओझेलमा पर्दै गएको किरातहरुको पौराणिक शक्तिशाली हतियार धनुवाणलाई दोस्रो पुस्तामा हस्तान्तरण गर्नुका साथै चार किरातहरुबीचको एकतालाई अझ बलियो बनाउँने अभिप्रायले प्राविधिक रुपमा निक्कै कठिन भएता पनि धनुवाण प्रतियोगिता आयोजना गरिएको प्रतियोगिताका संयोजक तथा थुलुङ सामाका अध्यक्ष राम्लि थुलुङ राईले बताए ।
पूर्खाहरुको विरासत थाम्दै चार किरातहरुको एकता हङकङबाट भएको शुभ समाचार देश विदेशमा सम्प्रेशण गर्नका लागि पनि धनुवाण प्रतियोगिता नै रोजिएको आयोजक किरात राई यायोक्खाका अध्यक्ष हरिचन्द्र राईले बताए ।
किरात राई यायोक्खा हङकङ आयोजक रहेको उक्त प्रतियोगिताका सह–आयोजक संस्थाहरु थुलुङ (राई) सामा हङकङ, किरात याक्खा छुम्मा हङकङ, किरात याक्थुम चुम्लङु हङकङ र सुनुवार समाज हङकङ रहेका छन् ।
प्रतियोगिहरुका लागि ५०० हङकङ डलर शुल्क राखिएको उक्त प्रतियोगितामा भाग लिन ईच्छुक १८ वर्ष पुगेका किराती खेलाडीहरुले १० नोभेम्बर २०१९ आइतबार सम्ममा फाराम बुझाउनु पर्ने सूचना समेत आयोजकले प्रेस विज्ञप्तिमा जारी गरेको छ ।

आयोजकको प्रेस विज्ञप्ति

===============