प्रकाश आङ्देम्बे, झापा दमक
(क)
आफुलाई भुलेर अरुको चियोचर्चा गर्नुपर्छ यहाँ त
अरु मरे मरुन आफ्नो झोली भर्नुपर्छ यहाँ त
साह्रै असल, साह्रै राम्रो, मिलनसार भने सबले
जाबो यत्ती प्रसंसा सुन्न पनि मर्नुपर्छ यहाँ त ।
(ख)
प्रत्येक प्रहर सिनोमा हुन्छ
सम्पूर्ण रहर सिनोमा हुन्छ
जतिनै उचाईमा उडे पनि
गिद्दको नजर सिनोमा हुन्छ ।
(ग)
लाग्छ सिमापारको मान्छे हुनुपर्छ
या त बलात्कारको मान्छे हुनुपर्छ
मलामीमा समेत चुटकिला सुनायो
सायद सरकारको मान्छे हुनुपर्छ ।
(घ)
जाबो जुम्रा त शिरमा पुग्छ
कमजोर मात्र तक्दिरमा पुग्छ
हामी त जिउँदो मान्छे पो त
बगरको ढुंगा त मन्दिरमा पुग्छ ।
(ङ)
अँध्यारो मै बसेर त घाम मिल्दैन
सजिलै त काम मिल्दैन नाम मिल्दैन
फालिनु, बग्नु, पुरिनु, कि जल्नुपर्छ
यहाँ त लासलाई पनि आराम मिल्दैन ।
(च)
प्रेमको बदलामा घृणाको सौगात देखियो
आलो घाउमा नुनचुक छर्ने आफन्तकै हात देखियो
जलाउँछु भनेर आएकाहरु खरानी भएर गए
कठै, आगो र दुश्मनको नि औकात देखियो ।
बगैंचा डटकम फेसबुक पेजबाट प्रत्यक्ष बाचनका गरिएको कविता, भाग २ ।
संयोजन: मगेन्द्र राई, सन्तोष तामाङ ‘विश्वास’ ।