शान्तिराम नेपाल (ताप्लेजुङ)
मकै छरेर मकै खोजिन्छ कालिपोके फल्न सक्छ ।
दिने दैवले नै हो भन्छन् भाग्यले छल्न सक्छ ।
सुकरात एक्लै थिए सत्यका लागि विष पिए
एक्लै पुकारेर हुन्न भीडले सत्य बदल्न सक्छ ।
लर्वरिन्छ , ढल्छ, बेहोस हुन्छ मान्छे माते पछि
प्रेमको एक प्याला मदिराले सत्य ओकल्न सक्छ ।
मान्छेले मेरो भनी रहन्छ, आफैँमा रहँदैन सधैँ
रुख जराले अडिएको हो खुस्किए ढल्न सक्छ ।
शरीर देखिन्छ मन देखिन्न देखेको पत्याउने हो
शरीर आगोले जल्छ मन पीडाले जल्न सक्छ ।
बगैंचा डटकम फेसबुक पेजबाट प्रत्यक्ष बाचनका गरिएको कविता, भाग २ ।
संयोजन: मगेन्द्र राई, सन्तोष तामाङ ‘विश्वास’ ।
