जानी दुश्मन

Author : ईन्द्र थेगीम
Published on : August 10, 2017


  
ईन्द्र थेगीम
ए ! मेरो जानी दुश्मन

म त छटपटिएरै मर्छु क्यारे

एकैछिन पनि बोल्न पाईन भने

तिमीलाई तथानाम भनिन भने

ठुस्केर तिमिलाई घुर्क्याईन भने,

 

सुख दु:खको गहिराई नाप्ने

भगवान भन्नु झिनो आशा मात्र न हो

आंट भरोसा भन्नु तिमी नै हौ

त्यसैले ए ! जानी दुश्मन

मलाई घरिघरि घच्घच्याई राख है,

 

भाग दौडको जिन्दगीमा

को कति पानीमा छ भन्ने कुरा

कि तिमी जान्दछौ कि म जान्दछु

तेसो र तिमी मेरो जानि दुश्मन

मलाई यसैगरी सताई राख है,

 

रङ्गिन जिउने बहानामा

कतै म हराएं भने

स्वार्थी हुने चाहनामा

संसार त्याग्न चाहें भने

ए ! मेरो जानी दुश्मन

तिमीले मलाई थम्थमाउनु है ।