काठमाडौ। पचपन्न सालदेखि गजल लेखनमा सक्रिय गजलकार संजिता देउजाको प्रथम गजल एल्वम ”मेरो गजल तिम्रो लागि’ गत मंगलबार राजधानीमा सार्वजनिक गरिएको छ ।
कार्यक्रमका प्रमुख अतिथि डा.कृष्णहरि बराल, उन्नति बोहरा शीला, गजलकार ज्ञानुवाकर पौडेल, मेरिना स्मृति र संजिता देउजाले संयुक्त रुपमा गजल एल्वम सार्वजनिक गरेका हुन ।
कार्यक्रममा प्राज्ञ तथा गीतकार उन्नति बोहरा शीलाले गजलमाथि चर्चा गर्दै सुनौलो भविश्व बोकेकी संजिताका गजल नेपाली संगीतको क्षेत्रमा एउटा चम्किलो तारा भएको बताइन ।
कार्यक्रममा ज्ञानुवाकर पौडेलले संजिताको गजल लेखनमाथि चर्चा गर्दै भने, “जुनबेला संजिताले गजल लेख्न थाल्नुभएको थियो, त्यो बेला महिला गजलकार कमै थिए । उहाँ निकै सम्भावना भएको गजलकार हो । विदेशको व्यस्तताले अलि हराउनुभयो । त्यति हुदाहुदै पनि गजल एल्वम निकाल्नुभयो, खुशीको कुरा हो ।”
उहाँले भने, “गजललाई कविता र गीतबाट अलग गर्नुहुन्न । संजिताका गजलमा कविता र गीत पनि पाइन्छ ।”
कार्यक्रमका प्रमुख अतिथि डा. कृष्णहरि बरालले एल्वममाथि चर्चा गर्दै नेपाली गजल संगीतमा ‘मेरो गजल तिम्रो लागि’ उत्कृष्ट संकलनका रुपमा आएको बताउनुभयो ।
उहाँले गीत संगीत लोकपृय हुन स्वर, संगीत, एरेन्ज, भिडियो भन्दा पनि गीत, गजल नै शब्द संरचना र लयका हिसावले उत्कृष्ट हुनुपर्ने बताएकाथिए ।
गजलकार संजिता देउजाको सभापतित्वमा सम्पन्न कार्यक्रममा साहित्यकार शुशीला देउजाले उपस्थित महानुभावहरुमाझ स्वागत मन्तब्य दिएभने, गजलकार संजिता देउजाले अतिथि तथा सहयोगीहरुलाई मायाको चिनो प्रदान गरिन ।
एल्वममा जम्मा आठ गजलहरु छन जसमा सत्यराज आचार्य, स्वरुपराज आचार्य र दीपक थापाको स्वरतथा संगित रहेको छ ।
महेन्द्र भवन कन्या स्कुलमा अध्ययन गर्दैदेखि गीत, गजल, मुक्तक र कविता लेखनमा रुचि राख्ने गजलकार संजिताले सयभन्दा बढी गजल लेखिसकेकी छिन, २५ भन्दा बढी रेकर्डमा रहेका छन्।उनको गजल र कविता मधुपर्कलगायत पत्रपत्रिकाहरुमामा प्रकाशित हुदैआईरहेको छन।उनी अहिले पढाईको शिलसिलामा बेलायत बस्दै आईरहेकीछिनभने संयुक्त मुक्तक संग्रह ‘मुक्तक महक’ प्रकाशित भै सकेको छ ।