आज राति उपाधिका लागि इङ्ल्यान्ड र इटालीबीच प्रतिस्पर्धा हुँदै…..

काठमाडौँ — युरो २०२० अन्तर्गत आइतबार राति फाइनल खेल हुँदै छ । लन्डनको वेम्बली स्टेडियममा राति १२:४५ बजे हुने खेलमा उपाधिका लागि घरेलु टोली इङ्ल्यान्डले इटालीको सामना गर्नेछ । सेमिफाइनलमा इटालीले स्पेनलाई पेनाल्टी सुटआउटमा हराएर फाइनल प्रवेश गरेको हो । त्यस्तै अर्को सेमिफाइनलमा इङ्ल्यान्डले डेनमार्कलाई २-१ ले हराएको थियो । इटालीको सेन्टरब्याक लियोनार्डो बोनुची र जर्जियो चिलिनीले सम्हालिरहेका छन् । विश्वका जस्तोसुकै फरवार्डलाई पनि यी दुई डिफेन्सलाई उछिन्न गाह्रो हुन्छ । यी दुवै डिफेन्स इटालियन महारथी युभेन्ट्समा आबद्ध छन् । युरो २०२० मा ६ खेलमा ५५५ मिनेट मैदानमा रहेका बोनुचीले २२ पल्ट बल रिकोभर गरेका छन् । कठिन परिस्थितिमा १३ पल्ट क्लियर गरेका उनले तीनपल्ट ब्लक गरेका छन् । प्रतिघण्टा २९.९ किमिसम्म दौडिएका ३४ वर्षीय उनको ८८ प्रतिशत पास सफल भएको छ । उनलाई युरोको फाइनलमा ह्यारी केन र रहिम स्टर्लिङलाई रोक्ने चुनौती छ । इङ्ल्यान्डका कप्तान ह्यारी केनले सही समयमा लय समातेका छन् । उनले युरो २०२० मा नकआउट चरणका तीन खेलमा ४ गोल गरेका छन् । गोलपोस्टमा १५ पल्ट प्रहार गरेका गरेका उनको आठ आक्रमण अन टार्गेट रह्यो । प्रतिघण्टा ३०.८ किमिसम्म दौडिएका २७ वर्षीय उनको ७३ प्रतिशत पास सफल भएको छ । टोटेनहमका यी फरवार्डले उनले थ्री लायन्सका लागि ६० खेलमै ३८ गोल गरिसकेका छन् । उनी कीर्तिमानी गोलकर्ता वायन रोनीको १३ गोल नजिक पुगेका छन् । उनको नेतृत्वमा इङ्ल्यान्डले ५५ वर्षयता पहिलो उपाधि जित्ने अपेक्षा गरिएको छ । श्राेत: इका

 

तपाईको प्रतिक्रिया

सम्बन्धित समाचार