काठमाडौं, नेकपा एमाले विभाजन भएर नयाँ दल दर्ताका लागि निर्वाचन आयोगमा निवेदन दर्ता भइसक्दा पनि माधव नेपाल पक्षकै केही नेताहरू भने अझै एमाले एकताको विकल्प नभएको भन्दै दौडधुपमा व्यस्त छन् । यी नेताहरू अझैसम्म केपी ओलीले माधव नेपालमाथिको कारबाही फिर्ता लिन्छन् र एमाले एक हुन्छ भन्ने आशमा छन् । बुधबार अपराह्न माधवकुमार नेपालसहितका नेताहरू नेकपा एमाले (समाजवादी ) पार्टी दर्ताका लागि निर्वाचन आयोगमा पुगेका बेला मध्यमार्गी भनेर चिनिएका माधव नेपाल पक्षका केही नेताहरू बेग्लै छलफलमा जुटेका थिए । यसरी अन्तिम घडीमा आएर माधव नेपालको साथ छाड्नेहरूमा घनश्याम भुसाल, योगेश भट्टराई, गोकर्ण विष्ट, भीम रावल, भीम आचार्य, सुरेन्द्र पाण्डे, अमृतकुमार बोहरा, अष्टलक्ष्मी शाक्य र युवराज ज्ञवालीसमेत छन् । मध्यमार्गी मध्येका एक नेता गोकर्ण विष्टले आफूहरू अझै पनि पार्टी एकताकै पक्षमा रहेकाले तत्काल कुनै पनि पक्षमा नलाग्ने बताए । विष्टले रातोपाटीसँग भने, ‘हामी अझै पनि पार्टी एकताको पक्षमा लागि रहेका छौँ । त्यसैले, कुनै समूहमा पनि लाग्दैनौँ । विष्टले एमाले विभाजनपछि कुन पक्षमा लाग्नुहुन्छ भन्ने प्रश्नको जवाफमा भने, ‘अझै पनि हाम्रो प्रयास पार्टी एकताकै पक्षमा हुन्छ । श्रोत:रापा
