काठमाडौं- माधवकुमार नेपाल नेतृत्वको एकीकृत समाजवादी पार्टीले स्थानीय तह निर्वाचनअघि मन्त्रीहरु परिवर्तन नगर्ने भएको छ । सो पार्टीले हाल सरकारमा रहेका केही मन्त्रीहरु फिर्ता बोलाउने र नयाँलाई पठाउने भन्ने चर्चा चलिरहेका बेला चुनावअघि कुनै पनि कदम नचाल्ने निष्कर्ष अध्यक्ष नेपालले निकालेका छन् । यस विषयमा हालै सम्पन्न पार्टीको बैठकमा समेत छलफल भएपनि स्थानीय चुनाव अघि मन्त्रीहरुलाई फिर्ता नबोलाउने निष्कर्ष निकालिएको एक नेताले जानकारी दिए । एकीकृत समाजवादी पार्टीबाट हाल शेरबहादुर देउवा नेतृत्वको मन्त्रिपरिषदमा विरोध खतिवडा, रामकुमारी झाँक्री, प्रेमबहादुर आले, कृष्णकुमार श्रेष्ठ किसान र भवानी खापुङ मन्त्री रहेका छन् । खतिवडा स्वास्थ्य मन्त्री रहेका छन् भने झाँक्री सहरी विकास मन्त्री रहेकी छन् । यस्तै प्रेम आले पर्यटन, किसन श्रेष्ठ सहरी विकास र भवानी खापुङ स्वास्थ्य राज्यमन्त्री रहेकी छन् । समाजवादीका एक नेताले रातोपाटीसँग भने, ‘पार्टीभित्र मन्त्री फेर्ने विषयमा छलफल भएको हो । तर तत्काल चुनावअघि कुनै निर्णय नलिने भनेर पार्टीमा निर्णय भएको छ । अब चुनावपछि मात्रै आवश्यक निर्णय हुने भयो । पार्टीका केही मन्त्रीहरुले एमाले अध्यक्ष केपी शर्मा ओलीसँग साँठगाँठ बढाएको प्रचारको पनि कुनै सत्यता नभएको समाजवादीका ती नेताको भनाइ छ । ‘समाजवादीलाई देखिनसहने एमालेकै साइबर सेनाहरुले चलाएको हल्लामात्रै हो । कुनै पनि मन्त्रीहरुले ओलीसँग भेट्नु त के फोनमा पनि कुराकानी भएको छ’, ती नेताले भने, ‘बेकारको हल्लाको अर्थ छैन । सरकारले स्थानीय तहको निर्वाचन मिति वैशाख ३० गते तोकेको छ भने सो चुनावमा गठबन्धन बनाएर चुनाव लड्नेबारे चर्चा भएपनि हालसम्म कुनै निर्णय भने भएको छैन । यहीबीचमा समाजवादीसहित सत्तारुढ दलबाट मन्त्री रहेकाहरुको जिम्मेवारी हेरफेरबारे चर्चा भइरहँदा समाजवादीले भने तत्काल कुनै हेरफेर नगर्ने निर्णय गरेको हो । समाजवादीबाट मन्त्री बनेकाहरूको कामकारबाही सन्तोषजनक नै रहेको पनि निकर्ष निकालिएको छ । यद्यपि, कतिपय कमी कमजोरीहरू पनि रहेकाले सच्याउँदै अघि बढ्नुपर्नेमा पनि पार्टीले सुझाव दिएको छ । साभार : रापा
