काठमाडौं – रसुवामा आएको विनाशकारी बाढीपहिरोका कारण हालसम्म १ हजार ३५६ जनाको ज्यान गएको पुष्टि भएको छ। गृह मन्त्रालयअन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणले २०८३ भदौ २२ गते साँझ ६ बजेसम्मको अद्यावधिक विवरण सार्वजनिक गर्दै विपद्मा परी विभिन्न मानव अङ्गसहित १ हजार ३५६ वटा शव फेला परेको जनाएको हो। हालसम्म १३ हजार ३९६ जनाको जीवितै उद्धार गरिएको छ भने करिब ४ हजार १९४ जना अझै सम्पर्कविहीन छन्। विपद्मा परी ज्यान गुमाएकाका शव सबैभन्दा बढि चितवन र नवलपरासीमा देखिएको छ। प्राधिकरणका अनुसार चितवनमा ३६३, नवलपरासी पूर्वमा २२३, नवलपरासी पश्चिममा २२१, नुवाकोटमा १९७, रसुवामा १६९, गोरखामा ७५, धादिङमा ७० र तनहुँमा ३८ जनाको शव फेला परेको हो। फेला परेका शवहरूमध्ये हालसम्म ९८ जनाको मात्र पहिचान भई आफन्तले बुझेका छन्। अन्य शवको पहिचानका लागि सम्बन्धित जिल्ला प्रहरी कार्यालयमा २ वटा फोटो र नाता प्रमाणित कागजातसहित डीएनए परीक्षणका लागि नमुना दिन सकिने व्यवस्था मिलाइएको छ। बाढीपहिरोमा परी हालसम्म करिब ४ हजार १९४ जना सम्पर्कविहीन रहेको तथ्याङ्क छ। जसमा नुवाकोट जिल्ला प्रशासन कार्यालयमार्फत करिब २ हजार ३४० जना र रसुवा जिल्ला प्रशासन कार्यालयमार्फत करिब १ हजार ९६७ जना नेपाली नागरिकको विवरण दर्ता भएको छ। यसबाहेक खोज तथा उद्धारमा खटिएका सुरक्षाकर्मी र कर्मचारी करिब १०० जना तथा ५८७ जना विदेशी पर्यटकसमेत सम्पर्कविहीनको सूचीमा छन्। सम्पर्कविहीन सूचीमा रहेका केही व्यक्ति पहिचान नभएका शव तथा उद्धार गरिएका व्यक्तिहरूसँग दोहोरिएको हुनसक्ने भएकाले विवरण रुजु गर्ने काम तीव्र पारिएको प्राधिकरणले जनाएको छ।साभार : नाद
