काठमाडौं – नुवाकोटको बेत्रावतीमा पुरिएको घरबाट उद्धार गरिएकी चन्डिका श्रेष्ठलाई बाढीले घरसहति बगाएको पाइएको छ । स्थानीय नारायणलाल डंगोलका अनुसार, उनको घरभन्दा ७० मिटर पछाडि चन्डिकाको घर थियो । तर उक्त बाढीले बगाएर ५० मिटर पर घर पुर्याएको थियो । बाढीले बगाएर लगेको घरबाट उहाँको उद्धार भएको हो । मेरो घर घडीघरसँग जोडिएको छ । आज उद्धार भएको उहाँ (चन्डिका) को घर मेराभन्दा ७० मिटर पछाडि थियो,’ डंगोलले अनलाइनखबरसँग भने, ‘बाढीले बगाएर मेरो घर भएको ठाउँबाट ५० मिटर पर पुर्याएको छ । त्यही बगाएको घरबाट उहाँलाई प्रहरीले झिकेको हो । विदुर नगरपालिका १०– का वडा सदस्य मंगल तामाङका अनुसार, बगाएको घरमा मान्छेको आवाज आएपछि उद्धारको लागि खबर गरिएको थियो । बगरमा मान्छेको आउजाउ भइरहेको थियो । बाटो खन्ने काम पनि सुरु भएको छ । त्यही बेला मान्छेको आवाज आएपछि उद्धारको लागि प्रहरीलाई खबर गरेको हो,’ उनले भने । चन्डिकाका श्रीमान् भने अझै सम्पर्कविहीन छन् । उनका देवरका अनुसार अहिले उद्धारपछि छाउनी अस्पतालमा ल्याइएको छ । ‘भाउजुसँग कुरा भयो । छाउनीमा ल्याएको छ,’ उनले भने । बाढी आएको ११ दिनपछि चन्डिकाको उद्धार गरिएको हो । यसअघि अपर त्रिशूली–१ बाट पनि आजै एक जना चिनियाँ नागरिकको उद्धार गरिएको छ । त्यस्तै, हिजो त्रिशूली–३ ‘ए’ को सुरुङबाट २ जनाको उद्धार गरिएको थियो ।
बाढीले क्षतिग्रस्त नुवाकोटको बेत्रावती:
सुरुङमा मात्र मानिसहरू फसिरहेको कुरा आइरहेका बेला शनिबार बाढीले बगाएका घरका संरचनाहरूभित्र पनि मानिस फसेको भेटिन थालेको हो । आज बाढीले क्षति पुर्याएको घरबाट चण्डिका श्रेष्ठको जीवित उद्धार भएपछि अन्यत्र पनि यस्तो हुनसक्ने देखिएको छ । बाढीका कारण रसुवा गढीदेखि धादिङको गलौंदी सम्मका घरहरूमा क्षति पुगेको छ । धेरै बस्तीका घरहरू पुरिएका छन् कति घरहरू बाढीले पल्टाएको छ । यस्ता घरहरूमा पनि मानिसहरू च्यापिएका हुनसक्ने देखिएको छ । बाढी प्रभावित क्षेत्रहरूमा अहिले पनि खोज तथा उद्धारको कार्य भइरहेको गृहमन्त्री सुधन गुरुङले बताएका छन् ।साभार : अखप
