अमेरिकाको पेन्सलभेनिया राज्यमा हुलाकमार्फत खसाइएका लाखौं मत अवैध घोषणा गर्न माग गर्दै अमेरिकी राष्ट्रपति डोनाल्ड ट्रम्पको चुनावी अभियानले गरेको माग एक न्यायाधीशले खारेज गरिदिएका छन् । पेन्सलभेनियाका न्यायाधीश म्याथ्यु ब्रानले अनियमितता भएको भन्दै गरिएको मागदाबी ‘जायज नभएको’ ठहर गरेका अमेरिकी सञ्चार माध्यमहरूले जनाएका छन् । आफ्नो आदेशमा न्यायाधीश ब्रानले ट्रम्पको चुनावी अभियान समूहले करिब ७० लाख मतदातालाई उनीहरूको मताधिकारबाट वञ्चित गराउने प्रयास गरेको जनाएका छन् । ट्रम्प पक्षधरले तनावपूर्ण कानुनी तर्क र आशंकाका आधारमा कुरा गरेका यायाधीशको भनाइ छ । योसँगै पेन्सलभेनिया राज्यमा डेमोक्र्याटिक उम्मेदवार जो बाइडेन विजयी भएको प्रमाणपत्र दिने बाटो खुलेको छ । पेन्सलभेनियामा बाइडेनको मत ट्रम्पको भन्दा कम्तीमा ८० हजारभन्दा बढी छ । अमेरिकामा नोभेम्बर ३ मा भएको राष्ट्रपतीय चुनावमा जो बाइडेन विजयी भइसकेका छन् । आफ्नो पराजय उल्टाउन कोसिस गरिहेका राष्ट्रपति ट्रम्पका लागि पेन्सलभेनियाका न्यायाधीशको निर्णयले ठूलो धक्का लागेको छ । ट्रम्पले आफू पराजित भएको अस्वीकार गर्दै आएका छन् । कुल ५ सय ३८ इलेक्टोरल कलेज मतमध्ये बाइडनले ३ सय ६ मत ल्याएका छन् । चुनावमार्फत ट्रम्पले २ सय ३२ इलेक्टोरल मत मात्र पाएका हुन् । राष्ट्रपतिमा निर्वाचित हुन २ सय ७० इलेक्टोरल कलेज मत आवश्यक पर्छ । चुनावमा व्यापक धाँधली भएको दाबी गरे पनि ट्रम्पले कुनै ठोस प्रमाण भने पेस गर्न सकेका छैनन् । ट्रम्पले पराजय स्वीकार नगर्दा अमेरिकी चुनावपछि सुरु हुने केही प्रक्रियाहरूमा ढिलाइ भएको जनाइएको छ । जर्जियामा पुन: गरिएको मतदानमा शुक्रबार बाइडेनले जितेको प्रमाणपत्र दिएपछि ट्रम्प अभियानलाई धक्का लागेको थियो । ट्रम्प अभियानलाई पुन: मतगणनाका लागि निवेदन दिन अब दुई दिनको समय बाँकी छ । त्यसैगरी अर्को महत्त्वपूर्ण राज्य मिसिगनमा रिपब्लिकन अधिकारीहरूले राज्यको निर्वाचन बोर्डलाई परिणाम प्रमाणीकरण गर्न दुई साताको समय माग गर्दै पत्र लेखेका जनाइएको छ । ट्रम्प समूहले विरोध गरेपछि अधिकारीहरूले सबभन्दा ठूलो काउन्टी डेट्रोइटमा राष्ट्रपतीय मतको पुन: जाँच गर्न माग गरेका थिए । तर मिसिगन डिपार्टमेन्ट अफ स्टेटले प्रमाणीकरण ढिलो गर्न र पुन: मतगणना गर्न कानुनले नदिने बताइसकेको छ । विस्कन्सिन राज्यमा ट्रम्प समर्थकहरूले पुन: मतगणना कार्यमा बाधा पुर्याएको निर्वाचन अधिकारीहरूको भनाइ छ । ट्रम्पका पर्यवेक्षकहरू हरेक मतमा समस्या देखाउँदै मतगणना कार्य ढिला गराउने नियतमा उत्रेका अधिकारीहरूको भनाइ छ । विस्किन्सिनमा पुन: मतगणना सम्पन्न गरी डिसेम्बर १ सम्ममा चुनावी परिणाम प्रमाणीकरण गर्न नसके ट्रम्प समूहलाई मुद्दा हाल्न बाटो खुल्नेछ । विस्किन्सिनमा बाइडेनले ट्रम्पको भन्दा २० हजारभन्दा बढी मत ल्याएका छन् । राष्ट्रपतीय चुनावमा मतदान गरेपछि अमेरिकीहरूले खासमा राष्ट्रिय तहमा नभई राज्य तहका लागि मतदान गरेका हुन्छन् । उनीहरूले राज्यका अन्य प्रतिनिधिका लागि मत दिएका हुन्छन् र ती प्रतिनिधिले अन्तत: राष्ट्रपतिलाई मत दिनुपर्छ । उदाहरणका लागि त्यस्ता प्रतिनिधिलले मिसिगनमा बाइडेनका लागि मतदान गर्नुपर्ने हुन्छ किनभने उक्त राज्यमा बाइडेनले चुनाव जितेका थिए । विभिन्न राज्यमा इलेक्टोरल मतको संख्या ती राज्यले संसद्मा गर्ने प्रतिनिधित्वका आधारमा तोकिएको छ । यसअघि सामान्यत: चुनाव जितेको प्रमाणपत्र दिनु औपचारिकता मात्र हुने गरेको भए पनि आगामी चार वर्षसम्म शक्तिमा रहने राष्ट्रपति ट्रम्पको प्रयत्नका कारण केही राज्यहरू रणमैदानका रूपमा परिणत भएका छन् । ट्रम्प सत्तामा रहिरहन सम्भावन निकै झिनो भए पनि असम्भव नै भने छैन । तर त्यसका लागि ट्रम्पले केही राज्यका चुनावी परिणाम उल्टाउनुपर्ने हुन्छ, जहाँ बाइडेनले दसौं हजारदेखि लाखभन्दा बढी मतले जितेका छन् । फ्लोरिडा राज्यमा २ हजारभन्दा कम मतले ट्रम्प पराजित भए पनि उनको कानुनी समूहले कारबाही अगाडि बढाएका मिसिगन, विस्किन्सिन र पेन्सिलभेनिया राज्यमा डेमोक्र्याटिक दलका गभर्नरहरू छन्, जो यी सबै गतिविधि हुँदा चुप लागेर नबस्ने निश्चित छ । श्राेत: इका